التاج الثالث

هذا التاج مررة الى الصديق مدحت محمد
والعزيز سنوحى

-----------------------------

تحدث عن نفسك فى عشر نقاط

بجد دة اصعب سؤال فى اى تاج مر عليا

لان صعب انى اقول انا شايفة نفسى ازاى المفروض الناس اللى تقول

بس ما علينا

1- اكتر حاجه بحبها فى الدنيا الحب .. لما الاقى اتنين ماشيين فى الشارع وماسكين ادين بعض وشكلهم بيحبوا بعض اقعد ادعى ليهم يارب ما يفترقوش .

2- باكرهة الظلم جدا .. حتى لو ظلم واقع على حد ما بحبوش .. وبما انى صريحة وما بعرفش اسكت .. دة وقعنى فى مشاكل كتير .. بس ما باتعلمش . باكرهة الغرور لما الاقى حد بيعامل حد بتعالى .. الحد ده باسقطه من حساباتى على طول . باكرهه لما اشوف حد بيشخط فى شحات بيطلب حسنة وبعدين لو حاولت تنبهه يقول دة اغنى منى ومنك .. انت تديلة الفلوس وحسابك وحسابه عند ربنا .. لو مش عايز تديله اصرفه بالحسنى .باكرهة ان الناس تربط بين الذكاء والشر .. والغباء والطيبة.. يعنى لو انت فى حتة والناس بيتكلموا بالالغاز والاشارات وانت فهمت وفهمتهم انك فاهم تلاقيهم على طول صنفوك شرير لو عملت عبيط ومش فاهم تبقى طيب وغلبان .. امخاخ بقى !!

3- حاجة غبية جدا فيا .. انى ممكن اتنازل عن حقى بمنتهى السهولة واسامح فيه .. لكن لو حد جه على حد انا بحبه .. تبقى باختصار وقعتة سودا وامة دعيا عليه .

4- انا قوية جدا وما فيش حاجة تقدر تهزنى او تضعفنى .. الا لما احب .. ما بيقاش فى انا .. بيبقى هو او احنا .. لكن انا كلمة بتنتهى من قاموسى .

5- بحب الحيوانات جدا .. وافضلها فى اى وقت على البشر .. الحيوان مشاعره صادقه لا بيكدب ولا بينافق .. حتى لما بيكون حيوان مفترس وممكن يأذى بيأذى لانه يا اما خايف او جعان .. لكن كتير من البشر بتأذى لانها تعشق الاذى .

6- باحب ركوب الخيل جدا .. اتعلمته من وانا عندى 7 سنين .. وما اعتقدش ان فى احساس بالحريه اجمل من اللى بحسه وانا بجرى بالحصان فى الصحرا .

7- عقلى مش من النوع اللى بيعرف يهدى او يقول اللى حصل حصل .. لازم افكر اوافهم واعرف اللى حصل كان سببه ايه .. ما فيش لحظة فيها عقلى ما بيفكرش .. وبسبب ده ما بعرفش انام الا بمنوم .

8- عمرى ما اعتقدت ان الفلوس حاجه مهمه .. ولو شفت شنطة مرمية فى الصحرا فيها مليون جنيه مش هامد ايدى اخدها.. لما الاقى اتنين افترقوا لأن العروسه عايزة كذا وكذا والعريس ما عهوش باتخنق ...والله اعرف واحده سابت واحد علشان خاطر الشقه اللى المفروض يعيشوا فيها .. على حد قولها .. اصل يا شرين موقع حجرات النوم مش متناسب مع موقع الصالة .. طب اصوت بالذمة ولا لأ .

9- باكرة جدا ان حد يتخذ عنى قرارات .. ان حد يقولى انا عملت كذا علشان مصلحتك او علشان

خايف عليك .. لانى انا طرف واعى مش ناقص الاهليه علشان حد يقرر عنى .

10- باعشق مصر .. بحبها حب جنون .. برغم السلبيات ورغم كونها من دول العالم الثالث .. الا انى عمرى ما اتمنى اعيش فى بلد تانيه .. ازور بلاد تانية ممكن .. لكن اعيش واموت فى مصر.


تانى حاجة اختار خمسة امررلهم التاج

رانيا

راندا

رحيل

اميرة الصعيد

Some one on life

تالت حاجة تروحى تبلغيهم

على طول انا رايحة اقولهم .

اياكى تدى التاج ده للى بعتهولك قبل كدة .

هو الغباء باين عليا اوى كده !!!