انا مرر لى التاج سيد سعد (مكسرات )ومحمود ( رئيس جمهورية نفسى
منذ فترة
لكن بما انى مشتته ومبعثره
كنت اظن ان التاج هو شئ شرفى
يعنى صوره التاج بيقولوا انها بيمرروها لحد
كنوع من التقدير ليه
وبعدين اخيرا لما فهمت
ولقيت رحيل
واجنده حمرا
عندهم التاج هو الاسئله
قلت ااااااااااااة
فهمت
طيب اما ارد على الاسئله
-------------------------------------------------------------------------------------------------
لو مكنتيش مصريه بس عربيه كانت هتبقى ايه نظرتك للمصرين واللى بيحصل فى مصر دلوقتى؟
اولا: لو كنت عارفه نفسى كويس
زى ما اعتقد انى عارفها
كنت هاقسم نظرتى للمصريين الى جزئين
المصريين كشعب اولا :
شعب عظيم ومكافح
شعب كريم
اما عيبه الاساسى فهو السلبيه – اللامبالاه وعدم الاكتراث
دايما تلاقى كل واحد منا يعمل الحاجه الغلط ولما حد ينصحه
يقوله سيبها على الله
طيب يا سيدى اعمل الصح الاول
اعمل اللى عليك
وبعدين سيبها على الله
السلبيه اللى زى دى كانت هى السبب فى غرق الباخره دندره
شالت فوق حمولتها ولما البعض انتبه لده
وحذر
كان الرد
ياعم سيبها على الله
ما حدش بيموت ناقص عمر
وكان ما كان
ثانيا:
المصريين كحكومه
هنا بقى كلكم هتكرهونى
على الرغم ان الحكومه مليانه فساد
والنظام كله فى حاجات كتير غلط
الا ان ده ما يمنعش اننا نشوف الايجابيات
كتير بيترحموا على عهد عبد الناصر
وفى عهده ما كانوش يقدروا ينشروا رد زى ده
الا وكان زائر الفجر زارهم
حتى عهد السادات رغم ايجابياته
الواحد ما ينساش طوابير الجمعيه
والفراخ الفاسده
والخناقات على الزيت والصابون
ده الصابون كان بالحجز
ما ينفعش الوحش يعمينا عن رؤيه الحلو
ما ينفعش ننسى ان فى كبارى اتبنت
وانفاق
ومدن جديده
اقل ما فيها الواحد بيشترى الصابون من غير حجز
ايه رأيكم : كرهتونى ولا لسه
ـــــــــــــــــــــــــــــــــــــــــــــــــــ
لو كنت اوربيه او غير مسلمه هتبقى ايه نظرتك للعرب والمسلمين؟
نظرتى لاى حد عمرها ما هتتغير على اساس دينه ايه
او ان مجموعه من اهل دين معين عملوا كذا
يبقى حكمى عليهم ككل قائم على الجزء اللى عمل الحاجه الغلط
لا يمكن طبعا
علشان ابنى حكم على مجموعه كامله
لازم اكون درست الدين ده كويس
علشان اعرف المبدأ نفسه قائم على ايه
لكن انى احكم على شعب من خلال ديانته
ده منطق مرفوض تماما
ــــــــــــــــــــــــــــــــــــــــــــــــــــــــــــــــــــ
لو قالوا لك انك بقيت رئيس جمهورية هتعملى ايه؟
لو قالولى كده
هارفض انى استلم المنصب
ـــــــــــــــــــــــــــــــــــــــــــــــــــــــــــــــــــ
لو سمح لك برؤية الرسول صلى وانك هتقولى كلمه واحده؟
ساعدنى – واشفع لى
انا تايهه
ــــــــــــــــــــــــــــــــــــــــــــــــــــــــــــــــــ
لو كنا فى عصرازدهار الاندلس كنت تتخيل نفسك ازاى؟
هكون نفس الشخصيه
بدون اى تغيير
انا اغير اللى حواليا
لكن ما حدش يغيرنى
نرجسيه انا مش كده
ــــــــــــــــــــــــــــــــــــــــــــــــــــــــــــــ
لو خطبت واحده او اتخطبتى لواحد واثناء الخطبة اكتشفت او اكتشفتى ان الطرف الاخر غير قادر على الانجاب هيكون ايه تصرفك؟
عادى جدا
انا بحب انسان
انا بحب شخصيه
بحب روح
مش ماكينه لتصنيع الاطفال
ـــــــــــــــــــــــــــــــــــــــــــــــــــــــــــ
لو طلعت على القمر هتكتبى ايه؟
هكتب اسمه
وجنبه لك للابد
ــــــــــــــــــــــــــــــــــــــــــــــــــــــــــــــــــ
لو مررت التاج لحد وماجاوبش هتعمل ايه؟
عادى
حريه شخصيه
من حقه يرفض او يقبل
ايه المشكله
ـــــــــــــــــــــــــــــــــــــــــــــــــــــــــــــــــــ
تمرر التاج لمين؟
د. ضياء
د. اياد
زين
سيد سعد
حازم شلبى
وحورس
تامر سليط
احساس لسه حى
sola
Altwati
Sir zidan
Egy anatomist
14 comments:
اول تعليق
اولا مبروك التاج
ثانيا
فعلا انتى تستحقيه
ثالثا
بصى ياشيرين
من حيث الناس هتكرهك
فده تاكدى منه
انى ده يعتبر حرية راى
ايوة
حرية راى
محدش يلومك عليها ايوة فعلا فى ايجابيات
للحكومة
محدش ينكر
بس لما السلبيات تغطى الايجابيات
بمعنى الحسنة
تقابلها ميت سيئة
مش هنقعد نغنى للحسنة
لكن لازم نشوف حل
عشان يبطلو سيئات
مش كدة ولا ايه
عزيزتى
شوفى مفيش شئ اسمه نظريتك لشعب كامل فى كل انواع البشر بس فى شعب غلبان وشعب مرفه يعنى الشعوب بقيت طبقات وطبعا لما بنقول الشعب يعنى نتكلم على غالبية الشعب
وزى ما قولتى كل عصر ليه بلويه ومع الزمن بنتكتشف بلاوى اكتر علشان كده الانسان ما يحبش اى شخص بدل حصل فى عصره ظلم بيين بدرجة كبيرة وحبنا بس نوجهه للشعب الغلبان مش للزعماء
دايمن بنحاول نحسن صورتنا للغرب وهما ليه مش بيحولوا يحسنوا صورتهم ادامنا وسيبين قادتهم يموتوا فى الشعوب الغلبانه والمدنيين مع ان شعوب الغرب بايدها القرار دايمن غيرنا يعنى
الانسان ده انانى يسعدك ويشفع ليكى لوحدك حتى حبيبك اللى كتبتى اسمه على القمر نستيه صحيح الجنة حلوة قوى والنار مخيفه تنسينا اقرب الناس لينا
ملحوظة:متزعليش
هو ميين يرضا يكون رئيس جمهوريه ده فاجر قلبه يتحمل الذنوب اللى بتحصل ادامه ومن وراه كمان
ياستى انتى كده تمام وفل
هو عصر الاندلس كان جميل قوى كده ما اظنش اكيد كان فيه مشكله
شوفى الاطفال شئ جميل وعلاقة الحب بين الاباء والابناء احلا علاقه حب بشوفها واظن لو خطوبة وعرفت كأنثى هفكر الف مرة قبل الزواج لاكن الرجل ممكن يقول اتجوز عليها بعد كده بس سيبحان الله سواء راجل او ست ربنا جعل الطلاق حل لو كان اختيارك خطأ او مقدرتيش تتحملى رغبتك فى الانجاب ليكى فرصه حتى لو اتجوزتيه
معلش بطول تعليقاتى عندك معزة اكيد
سلام يا افندم
doha
صح لازم نشوف حل علشان يبطلوا سيئات
ما اختلفناش
بس برضه ما ينفعش نقعد نقول
احنا فى عصر زفت
احنا ماعندناش ديموقراطيه
فين ايام عبد الناصر
لا على الاقل عندنا حيز معقول منها
وبنقدر نقول رأينا
وبنطلع نكت على مبارك
ما سمعتش عند حد مسكوه علشان قال نكته عليه
ده ما كانش الحال ايام عبد الناصر
اللى الناس شايله صوره فى المظاهرات ضد مبارك
تقدر تقول ان حد كان ممكن يطلع نكته على عبد الناصر
وتطلع عليه شمس
ده الاخ كان بيخاف يتكلم قدام اخوه
وننسى ان فى العهد اللى الناس بتترحم عليه ده
ما كانش حد يقدر ينطق كلمه نقد
او مجرد لوم
الا وكان ورا الشمس
ما ينفعش نترحم على حاجه
كانت اخطائها
اكبر من الاخطاء اللى بتحصل دلوقتى
غلط
ده اسمه تجنى
اه حياتنا مليانه غلطات
والحكومه مليانه فساد
بس مش الحل اننا نقعد نندب ونصوت
ونقول
عصروحشششششششششش
وما نعملش حاجه
زى ما انت قلت
لازم نشوف حل
___________________________________
احساس لسه حى
انا ما قولتش نظريتى عن شعب كامل
السؤال كان
لو كنت اوربيه او غير مسلمه هتبقى ايه نظرتك للعرب والمسلمين؟
قلت انى عمرى ما احكم على شعب من خلال دينه
على كل يا سيدى
انت عندك كلام كتير
محتاج تعبر عنه
علشان كده انا بمررلك التاج
وعايزه اسمع ردك
السلام عليكم
شوفى هو ايجاباتك محترمة اوى
وبتعبر عن شخصية مستقلة وهقولك بقى لو سمحتى اللى عجبنى واللى مش عجبنى
ابدا باللى مش عجبنى
طبعا رايك فى الحكومة
بصى ببساطة انا مش هحاول اغير رايك بس انا هحاول اقولك رايى بصراحة
التغير اللى احنا فيه دة
زى انك تقولى رايك بحرية فدة نتيجة الديمقراطية اللى فى العالم كله ودى ديموقراطية مفروضة على الحكومة من الخارج
وفى اوقات كتير بتكون نافعة للحكومة علشان بتكون عبارة عن تنفيس للى جوى الناس
ثانيا موضوع انك لو اتجوزتى او اتخطبتى وعرفتى ان الطرف التانى غير قادر على الانجاب
انا شايف ان رايك صعب اوى انه يكون واقعى لان الانجاب شهوة كبيرة جدا والحب للطرف التانى لو مدحلش فيه اولاد انا شايف انه هيقل كتير
طبعا مش رايى ان المراة مكينة لانجاب الاطفال بس قصدى انها هتكون شهوة كبيرة جدا وصعب اوى تتخلى عنها
ممكن متسيبيش الطرف التانى لكن اكيد هتكونى حزينة لعدم وجود اطفال
دة اللى مش عجبنى
اللى عجبنى بقى
السؤال بتاع لو طلعتى على القمر هتكتبى اى؟
وانتى قولتى هكتب بحبك للابد
السؤال دة جميل اوى وردك كان جامد اوى
انا تخيلت ان حد يكون بيحب حد للدرجة دى
ملحوظة اخيرة انتى بتقولى ان الناس ممكن تكرهك علشان ردودك
اقولك انطباعى انا بقى
انا على فكرة احترمتك جدا لان رايك فى الحكومة مجرد راى سياسى مش اكتر وانتى حتى ليكى اسبابك فى رايك دة
ثم انتى واضحة جدا ودة كل حاجة اصلا
يا ريت مكنش طولت
كل سنة وانتى طيبة
تقبلى خالص تحياتى
ااه التاج جالى تاني ما شي يا محمود انت السبب انا كنت كتبت عندة وهو لغهولي بس حاضر يا شرين هكتب التعليق في اقرب فرصة واشكرك على تمريره:)
اولا إجابات رائعة يا شيرين
ثانيا انا اسف اني مش متايع من مدة بس ظروف الشغل و الدراسة
ثالثا حلال عليكي الصورة
رابعا اسلوب حضاري جدا و قمة الشياكة انك تستأذني قبل ما تاخديها علي الرغم من انى اخدتها كده من الشبكة و لا عرفت مين صاحبها و لا استأذنته و لا كنت هعمل كده و لو هاخد فلوس حتى
بجد تحية كبيرة ليكي يا شرين
عزيزتى
انا عارف السؤال واخدت بالى من الاجابة
بس انا كنت اقصد ان اى شخص سواء اوروبى او عربى المفروض تكون نظرته لاى مجتمع تكون ازاى سواء عرب ومسلمين او افارقه وبيعبدوا النار متفرقش المهم احاول احكم بحياديه وبغالبية الشعب مش فئه او فئتين منه
اه ......انتى اخدتى بالك من ان بتكلم باستفاضه معاكى على العموم هحاول اقصر فى الكلام على قدر المستطاع
والتاج مليش فيه انا برد على اللى بيعجبنى منه عند الناس وبس
تحياتى
سلام
شرين مبروك عليك التاج
اما بالنسبه للحكومه فالعيوب والفساد اللى هى فبه غطت على اى محاسن
وشكرا لك
ولاء
no chance
بص يا سيدى رأى فى الحكومه انا كتبته كمجمل وبأختصار
يعنى فى كلام تانى كتير بعلرض فيه الحكومه
انا ما قلتش اننا عايشيين فى يوتوبيا هنا
كل اللى حاولت اوصله
ان ازاى بندور على الاحسن وبنعمل مظاهرات نرفع فيها صور عبد الناصر ؟
ازاى نطالب بالاحسن
واحنا ما سكين فى ايدنا صورة الاسوأ وبنطلب العوده ليه؟
ده التناقض اللى بتكلم عنه
على حكايه الانجاب دى
كل اللى اقدر اقولهولك
انك لو تعرفنى معرفه شخصيه
كنت هتتأكد انى قد كلمتى دى
لا يمكن اضحى بحب
او توأم روحى
علشان اخلف عيل
بس على كل حال ليك حقك تتعجب
فى ناس كتير فاكرين ان اى واحده لا يمكن تعيش من غير غريزه الامومه
انا ممكن اعيش من غير اى حاجه
ما عدا الحب
اخيرا
انا اتشرف جدا بتعليقاتك
واسلوبك الحضارى فى الحوار والمناقشه
وتقديرك للرأى والرأى الاخر
___________________________________
سيد
يا صديقى
كما قلت فى اجابتى
على السؤال
لو مررت التاج لحد وماجاوبش هتعمل ايه؟
عادى
حريه شخصيه
من حقه يرفض او يقبل
ايه المشكله
لو مش عايز تجاوب بلاش
دى حريتك الشخصيه
والله عادى جدا
___________________________________
Rain man
يا سيدى ولا يهمك
ولا تعتذر ولا حاجه
ربنا يوفقك فى شغلك ودراستك
والف الف الف شكر على الصوره
لما انزل البوست الخاص بيها
هاقولك
علشان تعرف قد ايه الصوره ملائمه للموضوع
الف شكر ليك ميت مره
وربنا يوفقك
____________________________________
احساس لسه حى
ليه انا حاسه فى كلامك انك زعلان منى
اتكلم باستفاضه زى ما انت عايز وانا هرد عليك
وانت زى ما قلت قبل كده
ده معزه اكيد
انا مررتلك التاج
علشان حسيت عندك وجهات نظر تستحق الطرح
اوعى تقصر فى الكلام
احنا اصدقاء
ما تخلنيش ازعل
وانا لو كنت قصرت فى الرد
والله انا تعبانه جدا
ومش مركزه
بس بحاول دايما ارد على قد ما اقدر مهما كنت تعبانه
صافيه لبن
___________________________________
ولاء
نفس الرد اللى عماله اقوله
يا ناس انا مش بدافع عن الحكومه
كل اللى حاولت اوصله
ان ازاى بندور على الاحسن وبنعمل مظاهرات نرفع فيها صور عبد الناصر ؟
ازاى نطالب بالاحسن
واحنا ما سكين فى ايدنا صورة الاسوأ وبنطلب العوده ليه؟
ده التناقض اللى بتكلم عنه
العزيزة / شيرين
أعجبتني جدا ردودك
التي تمزج بين الرقة والقوة
والتفرد
والزهد إلا في الحب
شكرا على تمرير التاج لي
هذا أسعدني جدا
أشعرني بأن تذكرك لي كينونة أخرى توازي كينونتي
أعتذر عن عدمي تمكني من الرد على التاج
نظرا لإغلاق المدونة
فالتمسي لي عذرا يليق برقتك
محمد
عزيزتي شرين
دا شرف كبير يا شرين أن تضعيني في مصاف من يستحقون تمرير التاج عليهم. شاكر لك هذه الثقة الكبيرة، ودعيني اشيد باجاباتك التي جمعت هذا المزيج "الشريني" من الرومانسية والإنسانية الخالصة والواقعية في نفس الوقت، مع تفاوت واضح في نسب الخليط، ولكن هكذا الإنسان، سر لا يعلم مكنوه سوى الله سبحانه وتعالي.
كل سنة وانت طيبة يا شرين
وربنا يخلي السنة القادمة كما تتمنيها إن شاء الله على كافة المستويات.
عميق تحيتي وخالص خالص مودتي
ضياء
محمد
اخيرا عرفت اسمك
ولا عايزنى اكتب
altwati
لابد ان اتذكرك بالطبع
وكيف لا؟
وانت من وصفتنى بأنى ارق من سيبل فين
كيف يمكننى ان انسى من اعطانى قيمه عاليه
كقيمة سيبل
وكما قلت
التاج حريه شخصيه
لك حق القبول او الرفض
لا تنقطع عنى ابدا
انتظر تعليقاتك دائما
د. ضياء
افتقدت زياراتك وتعليقاتك
لم تكن فقط احد الذين امرر لهم التاج
بل كنت اولهم
عندما استقر السؤال بعقلى
كنت اول من تبادر لذهنى
ارجو ان يكون المزيج الشرينى الذى تحدثت عنه
قد نال اعجابك
وجعلك تعرف بعضا من الكلمات المفقوده
التى تساءلت عنها يوما
فى تعليقك لى على بوست كلمات مفقوده
شرين
شكرا على التاج بس حد كان يقولى ولا يدينى ميسد حته مع الاميل بتاعى مرمى فى البورفيل بتاعى
اجباتك منطقية والمواضيع فى الاخر وجهات نظر
حتى لو اختلفنا فيها
واكيد حرد على التاج فى اقرب فرصة
وبما انه معظمعمه سياسى يبقى حرد عليه فى كلمتين فى العضل
Post a Comment