بائسه
ضعيفه
مرتجفه
غارقه بمياة الامطار
تقف امام العربات فى منتصف الطريق
لا تفقه شيئا
ترمق الطريق بنظرات خاويه
نظرات خرساء
نفير العربه التى تتقدمنى يتعالى
وهو يكاد ان يدهسها
ثم يتفادها فى اللحظه الاخيره
وهى لا تزال قابعه بمكانها
لا تفقه شيئا
وكأنها لم تكن لتفقد حياتها منذ قليل
اتقدم بالسياره
تنعكس الكشافات الاماميه على عينيها
وهى لا تتحرك من مكانها
تسمع صوت النفير ولا تتحرك حركه واحده
اقف بالعربه
واطلب من شقيقتى النزول من العربه واحضارها
تنزل شقيقتى الحبيبه عدوا من السياره اليها
وهى لا تزال على حالها
لا تفقه شيئا
تلتقتطها شقيقتى الغاليه بين يديها وترفعها من على الارض
دون ادنى مقاومه منها
او اى رد فعل
كأنك تحمل شيئا
وليس كائن حى
الرمال والاوحال عالقه بجسدها
المبتل بماء المطر
تأتى بها الى العربه
فقد كنا تقريبا امام منزلنا بالاسكندريه
نصعد بها الى الشقه
وهى اقرب منها الى الموت منها الى الحياه
ترتجف ويهتز رأسها بصوره تذيب اشد القلوب قسوه
ومن خلال مشاهدتى لقناة
Animal plant
وقراءتى المتعدده لكتب الحيوان
اقدر انها فى حالة صدمه
تشترك الاسره بأكملها فى تحضير وجبه لها
ونضعها لها لتأكل
تلاحظ اختى انها تمشى بطريقه متخبطه
ولاترى الصحن بل تأكل الصحن نفسه وليس محتواه
ولا ترفع رأسها ابدا
بل تكاد ان تمشى ورأسها ملامس للأرض
وبعد عدة اختبارات ومحاولات
نكتشف ان البائسه عمياء
ومنطقيا فسرنا ان السبب الذى ادى بها الى حالة الصدمه تلك
هو نفسه السبب فى فقدانها لبصرها
ربما صدمتها سياره
او تلقت ضربه قويه على رأسها
او وقعت من مكان مرتفع وصدمت رأسها
كانت صغيرة السن جدا
ربما لا تتعدى الشهرين
وكان هذا اليوم حتما هو يومها الاخير على كوكب الارض
فماذا تفعل قطه عمياء فى طريق تمر به السيارت
ان استطاعت السياره الاولى والثانيه تفاديها
فحتما ستدهسها الثاثه
وان نجت من كل هذا فكانت ستموت جوعا
حمدت الله على اننا وجدناها بهذا اليوم
وتخيلت ما كان من الممكن ان يكون مصيرها لو اتينا مبكرا قليلا
او متأخرا قليلا
وخلال فترة وجودنا بأسكندريه
بدأت فى التحسن وتظهر علامات على انها تسترد بعضا من بصرها
لم يطاوعنا قلبنا ابدا ان نتركها هناك
فأتيت بها معى الى القاهره
وسأذهب بها الى المستشفى الخاص بالحيوانات
وستمنح علاجا كاملا
حتى تسترد عافيتها وقوتها
ولن اتخلى عنها ابدا
ستصبح احد افراد العائله للأبد
ملحوظه:
التاريخ على الصوره غير صحيح
احداث هذا البوست كانت الاسبوع الماضى
ولكل من اهتم صورها موجوده بمدونة الصور
34 comments:
كما طلبتي مني يا عزيزتي...
الأول،
و لكن أنتي الأولى دوماً... الناس بيقولولك كلام كتير حلو، و أنا مقدرش أقول أكتر من اللي بيتقال، لأن كل حاجة إنسانية فيكي...
ملامح إنسانة في زمن انعدمت فيه الإنسانية... أنا البوست بتاعك دمعت معاه... و أول مرة مش عارف أكتب كلمتين على بعض...
يمكن عشان لسه حاصل معي الأسبوع اللي فات بردو... بس فرملت في لحظة واحدة من غير حتى ما اكترث إني أنظر في المرآة الخلفية... و لكن ربنا سترها...
تحياتي لإنسانيتك وقت م الإنسانية و الرحمة مطلوبين... لعاطفتك و عطفك... لقلبك و عقلك...
إمضاء:
فخور إني أطالع مدونتك كل صباح...
sir zidan
انت كانت كلماتى انا ادمعت عينيك
فأنا كلماتك ادمعت عينى
وان كنت مش عارف تكتب كلمتين على بعض
احيانا يكون الصمت ابلغ من كلماتك كثيره
الاحساس ابلغ من اى كلمات
تحياتى لك انت
وانا الفخوره انك تطالع مدونتى كل صباح
ياه ياشيري..انا باحب القطط جدا
ومقدرة احساسك جدا جدا
فكرتيني بحكاية مشابهة حصلت معايا
بس كانت عصفوراية مش قطة
وخدتها وكبرت وبقت قمر
:)
dr.Roufy
الم اقل لك من قبل اننا نمتلك احساسا متشابها لحد كبير ؟
بوست الغيبوبه
والرغبه فى الانسحاب من هذا العالم اكد لى ذلك
انا يا ستى عندى
عصافير وبغبغان
وكلب
ودلوقتى وقطه كمان
ربنا بقى يخليلك عصفورتك القمر دى
وربنا اكيد هيجازيكى كل خير على انك انقذتيها
ابقى قوليلى مسمياها ايه
يا قلبى على القطه
بجد ربنا يكرمك يا شريين على اللى انتى عملتيه وانك خدتيها معاكى البيت
لو حد غيرك الكلمه الوحيدة اللى هيقولها
"ما تموت ولا تروح فى داهيه دى حته قطه"
يارب ترجع حلوة تانى وتبقى كويسه
تبقى طمنينا عليها
وربنا يخليها ليكى
lonly smily
بجد الكلمه اللى انت قولتيها صح
فى ناس كتير ولا بتفرق معاها حياة الحيوان
يقولوا ما تموت ولا تروح فى ستين داهيه
انت عارفه واختى بتجيب القطه العربيه الناس كانت بتبصلها فى الشارع شويه مستغربين
وشويه بيضحكوا ويتريقوا
وادينى بأطمنك عليها هى ابتدت تشوف تانى
وابتدت تسترد حيويتها
وبكره ان شاء الله الصبح هتروح المستشفى
هيكشفوا عليها ويطعموها
وان شاء الله هترجع قطه طبيعيه وعسوله
واحنا سمناها
كيتى
ايه رأيك فى الاسم ؟
السلام عليكم
صباح الفل
المرة اللى فاتت كانت الالفاظ والمعانى حلوة اوى وتجعل الواحد يبتسم وهو بيقراها لكن المرة دى الواحد بيبتسم لانه عرف حد زيك وبالانسانية دى
اى حد مكانك كان تجنبها بالعربية وخلاص لكن طبعا تبقى اخلاق الفرسان للفرسان فقط
تقبلى تحياتى
بجد بجد تسلم ايدك
ياريت كلنا نبقى محترمين زيك مع الحيوانات
مكنتش حاجه وحشه حصلت
انتى عارفه ان استراليا مرضتش تصدر لمصر خرفان عشان بنعاملها و بندبحها غلط مع انهم هيستفيدو"استراليا"
تسلم ايدك و شكرا على الكومينت فى البلوج بتاعى
شرين
صباح الخير الاول
بين البوست اللي فات والبوست دة لقيت تشابه كبير بينهم البطله اللي مزقها الحب وذابت في بقايا حنينها رأيتة في حال هذه القطة البائسة الذي بعثك الله لها ليكتب عمر جديد لها بين يديك اقرأ ما تكتبية عن هذة القطة ولكنى ارى بطلتك وهي واقفة على الشاطئ
لكن مع فارق النهاية قطتك قدر لها بداية جديدة لكن بطلتك لم تأتي بدايتها الجديدة بعد
احساسك وفعلك اتجاه القطة ستأجري علية من الله سبحانة وتعالى أن شاء الله ربنا يكرمك
تحياتي ومودتى
لصديقتى الجميلة دائما
عزيزتى
فكرتينى بموقف زى كده لقطه كانت صغيرة متعلقه على سلك كهرباء ولا عارفه تنزل منه وتنط لاى بلكونه ولا عارفه ترجع للسطح اللى وقعت منه كان بعد الفطار فى رمضان وانا مش عارف اعمل ايه وصوتها من الخوف فى ودانى كانه صريخ طفل محتاج اى مساعدة وانا مش عارف اساعدها ازاى فكرت اساعدها وملقتش حل قولت اطنش بدل مش بايدى اى شئ بس خرجت من البلوكونه وبتفرج على التليفزون عادى كان مفيش روح تنتظر الموت كان صوتها بسمعه عالى فى ودانى دخلت تانى وبصيتلها كانت خلاص مش قادرة تقف اكتر من كده ووقعت فى الشارع وماتت وبكيت
صعب نشوف روح على وشك الموت وهى لا حول الله ولا قوق لها
تخيلى بقه لو فى بلد فيها حرب وطفل هو مكان القطة والقنابل عماله تنزل على البيوت من حوليكى ونشوفى بعنيكى ناس بتموت واطفال ونساء
ايه القسوة بتاعت الدنيا دى
انا شوفت فليم عن الفلوجه واللى عملوه الامريكان فيها وقنابل النابلم واللى عملته فى اهل المدينه وجابوا صور نساء كانت محترقه جسديا وملابسها مفهاش اى شئ اللى بيصلى والطفل الرضيح وحاجات تخلى الانسان يعرف اد ايه هو ضعيف واوقات بيكون جبان ومستنى رحمة ربنا علشان يرتاح
اسف للتطويل
القطه جميله واللى عملتيه قيمته كبيرة قووووى وثوابه عظيم
ربنا يرحمك بعملك يا رب
سلام
فاكره يا شيرين تعليقى على الصور فى مدونه صور بسيطه الموقف ممكن يكون غريب من اى حد بس على رقه مشاعرك والفكره الى كونتها عنك من كتباتك ومن اخلاصك فى العهود مش مستغرب الف مبروك العضو الجديد وربنا يخليها ليكى يا شيرين
محمود
اولا بعتزر بس دلوقت شوفت ردك على التعليق الى فات
ثانيا: انا قلت الى زعلانى فى التعليقات على البوست مش تعليقى انا كنوع من التوضيح
ثالثا: انا بكره كلمه اسف وشكر فى علاقات الاصدقاء لانتها بتحمل العلاقات الانسانيه رسميات مش مستهلاها اساسا
ولو كان كلامى لخبطك فى العموم انا اسف
محمود
عزيزتي شيرين
بعض الناس كالسكاكين لا تتحرك الا لتجرح ، و البعض كدفأ الأم ، أينما يذهبون تنبعث الحياة ، تحياتي و تقديري
جميلة يا شيرين
ربنا يجازيكى عنها خيرا إن شاء الله
ويعافيهالك وتلاقيها تلعب معاكى واكيد هتحبك اوى
بس أنا زعلانه منك أوى
إزاى تكونى فى اسكندرية ومش تقوليلى
ليا عندك حق عرب بجد
تحياتى
انا بشكرك جدا جدا
مقدرش اقولك موقفك فرق معايا ازاى
كأنك انقذتى حد اعرفه
انا بيصعب عليا قطط الشوارع زى البنى ادمين بالظبط من ساعة ما قطة ماتت جنب منى بالظبط لما عربيه دهستها
ساعتها حسيت ان قلبى كان تحت العربية
انا بشكرك بجد
انتى اخترتى لها اسم ولا لأ
فعلا يا شيرين
كان ينبغي عليكي ان تلتقطي تلك القطة البائسة
" وتباً لهذه ال " ينبغي
في كل مرة يأتي احدهم ليعطيكي قائمة من اليـ " ينبغيات " ..التى لا تنتهي
تبأ لهم هم ايضا فلا ينبغي ان يقوموا بمثل هذا
..
هل تعرفين
اردت ان اقول فى البداية و بدلا من المقدمة الينبغية السخيفة تلك اننى لم اعرف معنى الشفقة من قبل
لم امارس هذا الترف
ولكني بعد قراءة موقفك هذا اكتشفت كم كنت مخطئا
فبعد ان ذرفت دمعة او اثنتين لا اذكر من جراء الميلودراما الصغيرة التى رأيتها فى البوست الخاص بك
مسحت دموعى بعنف
و اشفقت على نفسي
تحياتي
ينبغي
:P
no chance
ربنا يخليك
بس اعتقد ان ممكن لو كانت
القطه اتحركت اوجريت
كنت فاديتها وخلاص
وجودها فى نص الشارع
وان النور يضرب فى عنيها وما تتحركش
هو ده كان الدليل ان فيها حاجه غلط
ولازم اساعدها
ما كنش ينفع اسيبها كده
وبعدين انا افاديها وغيرى يدهسها
___________________________________
ميدو
انا اسفه بجد
انا ما شفتش تعليقك على الصور الا امبارح وكنت بانام على الاخر
يارب دى ما تكونش زيارتك الاخيره
صورة الفندق اللى فى مدونتك اكثر من رائعه
ويا ميدو
على حكاية الخرفان دى
انا لو ابتديت كلام مش هاعرف اسكت
والنبى خلينى ساكته
ده انا باكره العيد بسببها
___________________________________
سيد
عزيزى جدا
لا اعلم كيف انتبهت هذه النقطه
انت رائع حقا
انا لم انتبه اليها
الا عندما ذكرتها انت
ولكنك بذكرك هذه النقطه انتبهت الى نقطة تشابه اخرى
القطه عمياء
رغم عن ارادتها
والله اعاد لها بصرها
اما بطلة القصه
اعتقد انها عمياء بارادتها
بل وربما لا تريد ان تستعيد نعمة البصر ابدا
هى اعجبتها اخر صوره رأتها عيناها
واعتنقتها
واغلقت عليها عيناها ولا تريد ان تلوث ذاكرتها برؤية سواها
فقط تبقى هذه الصوره هى الاخيره
ومعها للأبد
ووالله يا سيد انا ما خدت القطة علشان مستنيه ثوابها
ولا بقول دى هتمسحلى اخطائى
لأ
انا ما اقدرتش اشوف كائن حى بالضعف ده وماامدش ايدى واساعده
لو عرفت مره واحده بس اقسى قلبى
هتبقى القسوه جزء منه
وده انا برفضه تماما
__________________________________
احساس برضوا حى
يا اخى طب يعنى انت ما عرفتش تقف تحت السلك ده
بباطنيه او اى حاجه علشان تلحقهابدل ما تقع على الارض
ازاى قدرت تتصرف عادى وتتفرج على التليفزيون
احنا فعلا كل يوم بنشوف كوارث فى العراق
وفلسطين
بالرغم ان بعد ما ربنا ريحنا من الزفت شارون
الموضوع هدى شويه
بس ما انتهاش
والانسان فعلا ضعيف وجبان
وبقى نادر جدا لما تلاقى حد يفكر ينقذ حد او يساعد حد ما يعرفوش
كل واحد يقول وانا مالى
حاله من اللامبالاه و السلبيه تسيطر على
الناس وتتفشى فى
مجتمعاتنا العربيه كالسرطان
________________________________________
محمود
انا فاكره التعليق جدا
انا على فكره ما بانساشااى حاجه ابدا
لدرجة ان فى ناس علشان ذاكرتى دى
بتقولى قلبك اسود
مش عارفه ايه العلاقه بالضبط
بس الحمد لله
الايام دى مصابه بنوع من العته والغباء
مش مخلينى مركزه فى اى حاجه
ده انا حتى لما باصحى من النوم مش بأبقى عارفه انا فين
حاجه تفرح مش كدة
وعلى القمر الجديده
احنا خدناها النهارده الممستشفى
وهتبدء كورس علاج وان شاء الله هتخف
بس طبعا انا اللى هسهر بيها
وهاخد بالى منها ومن مواعيد دواها
وانضفلها
المهم ان انا اصلا مش فى حاله نفسيه تسمحلى انى اخد بالى من حد
ده انا عايزه حد ياخد باله منى
بس مش مهم انا
المهم هى تخف وتبقى كويسه
واشوفها كده بتلعب وتجرى
يمكن ساعتها ابقى كويسه
وانا فهمت انك تقصد بالتعليقات على البوست اللى مزعلك انت
دى فهمتها
لكن ما فهمتش ايه هو اللى مزعلك
قريتى التعليقات اكتر من مره
وقريت البوست يمكن افهم
لكن فراااااغ
ما فهمتش
بجد مش فضول
انا اخر واحدة تتحلى بالفضول
بس ما باحبش حد يزعل منى من
غير ما اعرف ليه
على الاقل يكون عندى قدره على الدفاع عن نفسى
اما عن موضوع انك ما بتحبش الاعتذار والشكر
الاعتذار مش ضعف يا محمود
الاعتذار والاعتراف بالغلط د قوة
انك تسكت وما تعتذرش عن حاجه غلط دى سهله جدا
لكن منتهى القوه انك تعترف انك غلطت وتعتذر للى غلطت فى حقه
انا مش ماشيه باقول انا اسفه لكل الناس
ولا بعتذر عمال على بطال
بس اتا اعتذرتلك
لأنى جوايا عارفه انك مش هتظلمنى
اكيد فى حاجه زعلتك فعلا
علشان كده اعتذرت ليك
___________________________________
د. اياد
لا يوجد فى الدنيا حنان او دفئ يفوق دفئ الام
وحينما تصفنى انا بذلك
وانا لست اما
لابد ان اقول ان هذا اعظم ما قيل لى يوما
___________________________________
سهر اليالى
يا حبيبتى
طيب انا ما شفتكيش قبل كما اسافر هاقولك ازاى
وبعدين هى اصلا كانت سفريه مجنونه
ضربت فى دماغى اسافر اليوم اللى قبل الوقفه
علشان انا ما باحبش العيد
وعلشان كان فى ميعاد نوه عندكم
فرحت مكوره شويه هدوم فى شنطه
وجرى على النوه
والقطه زى ما قلت
راحت المستشفى النهارده وهتبتدى كورس علاج كامل
وان شاء الله هتبقى قردتى الصغيره
____________________________________
مريم
هافضل برضه اقولك يا فنانه
انت عارفه انا لو كنت شفت المنظر اللى انت قولتى عليه ده
كان زمانى فى مستشفى الامراض النفسيه
او مصابه بعمى هيستيرى
واسمها كيتى
__________________________________
rain man
لا يوجد ينبغيات
انت لا تحتاج اليها
اثار البوست دموعك
وجعلك تعيد التقييم
هذا وحده يكفى
ان يكون البوست ادى المطلوب منه
العوده الى الفطره الاوليه
التخلى عن انانيتنا وتشبعنا بذاتنا
وان نعلم ان هناك فى الكون مخلوقات سوانا
ياه ياشرين
انا مستحملش اشوف قطه بالشكل ده
ده انا لو حد من قططتي لقيتو بس متغير مش بستحمل واحاول اشوفو مالو
بجد انتي ليكي ثواب كبير عند ربنا
عشان القطط دي بالذات من اضعف المخلوقات
وربنا طلب منا اننا نكون رحماء بالحيوان
والي انتي عملتيه ده اجمل شيء شفتو بحياتي والله
بجد جزاكي الله خيرا
يا
يا سمين
يا حبيبتى
انا عارفه انت بتحبيهم اد ايه
بس والله ما انقذتها بحثا عن ثواب
انا انقذتها لأنها كانت ضعيفه
لا يمكن اشوف كائن حى فى حالة الضعف دى وما امدش ايدى واساعده
السلام عليكم
موقف صعب جداً ومؤثر
إن شاء الله ليكي أجر وثواب كبير على إنقاذك ليها وإطعامك ليها .
أدام الله عليكي إنسانيتك ورقة قلبك.
تحياتي
(:
hi ana ba7gez makan now 2avl el 2a7'eer im gonna reda it and back
مش عارف ليه اول مالقيت دعوتك لي في مدونتي اني اقرا الموضوع ده وانه هيعجبني حسيت انه حاجه متعلقه بالقطط
والله العظيم ماعرف ليه بجد
ربنا يباركلك يارب ويجعل اللي عملتيه في ميزان حسناتك يوم القيامه
ولو لسه القطه دي عندك وجبتيها معاكي في مصر انا مستعد اخدها منك واتكفل بيها
خصوصا اني بقالي فتره ماربيتش قطط وشكلها عسول قوي
وكل سنه وانتي طيبه
سلامووووووووووووز
علاء
والله زى ما بقولك للكل
ليس طمعا فى ثواب
لكن من المستحيل ان ارى كائن فى هذه الحاله دون ان امد يدى لاساعده
_____________________________________
sola
there is a place always ready and waiting 4 u
dont u worry
____________________________________
sooo
رائع كالعاده
وقمة الحنان
احيانا اكون على ثقه ان هناك الكثير بك لم يكتشفه انسان بعد
تخفيه خلف المرح والكومديه الدائمه
ولا لماذا
عجوز وعندى 30 سنه ؟
يا ريت تقرى البوست اللى تحت ده كمان
اعتقد ممكن تحبه برضه
بس بقى انا مش هديك القطه
دى بنتى
حبيبتى
حد يسلف ولاده برده
للاسف انتى مفهمتيش كلامى
اللى اقصده ان فى بلدنا مع حالة القهر والذل والجرى ورا المادة واللى بنشوفه من اطفال شوارع وناس محتاجه كتير قلبنا ابتدا يموت شويه بشويه والحنيه تروح شويه بشويه وانا كنت هنزل اقف تحت فى الشارع ببطانيه مدة اد ايه ساعة تفتكرى لو هعمل لقطة كده يبقا مش هعيش حياتى خالص لانى كل يوم بشوف الف حد محتاج مسعدتى ومش بساعده وكمان فى ناس تحن على الحيوان وللاسف مش بتعرف تحن على الانسان نفسه اللى روحه اغلى واطهر من الحيوان بكتير
مش هكدب عليكى صوتها كان بيوجعنى بس كتر الاوجاع من اللى بشوفه وبعيشه خله الوجع ميحركنيش
والجندى اللى ممكن يموت انسان اعزل ولا امراه ولا طفل للاسف تلاقيه فى مظاهرة لحماية حقوق الحيوان
واكيد كتير من اللى اتصعبوا على القطه
بيمروا على كام طفل شارع فى طريقهم ولا بيأثر فى شئ من احساسهم
سلام
احساس لسة حى
انت ليه بتقول انى ما فهمتش كلامك
انا علقت على جزئية القطه اللى انت قولتها
وزى ما انت قولت بالضبط
الانسان بيجمد قلبه فى حاجه
شويه شويه الحنيه بتموت وبيجى مكانها قسوه
انا كتبت الجمله دى لناس كتير اكتر من مره
وسواء كان الانسان فى مظاهره عن حقوق الانسان او الحيوان ففى الحالتين بيدافع عن روح ووجود كيان
وبعدين انا اسفه جدا
لو كنت انت فاكر ان روح الانسان اطهر واغلى من الحيوان انا مش شايفه كده
الاتنين روح
وان كان الانسان بيعرف يتكلم لما يحتاج مساعده
الحيوان ما بيعرفش
وان كان الحيوان بيساعده 10
البنى ادم بيساعده 100
وبعدين مش معنى ان فى بنى ادم محتاج مساعده يبقى ملاك وغلبان
اكيد ممكن برضه يكون عامل اخطاء وممكن جدا تكون روحه مش بالنقاء اللى بتتخيله
لكن الحيوان هو الحيوان الفطره اللى ربنا خلقه عليها من غير زيف ولا خداع
خد عندك المثل ده
ماما شافت ست لابسه شوال فى الشارع
وعماله تشحت
صعبت على ماما جدا
وراحت مشتريالها هدوم كتير
ومديهالها
فضلت الست تلبس الشوال برضه
وما تلبسش الهدوم
ليه لانها كده بتصعب ع الناس اكتر يقوموا يدوها فلوس وهدوم
ادى بنى ادم صعب على بنى ادم
والبنى ادم مد ايده وحاول يساعده ويخفف عنه
فكرت الست دى كانت تستحق المساعده
لكن ما فيش حيوان هيعمل كده
ما فيش حيوان هيزيف حقيقته
البنى ادم بس اللى بيعمل كده
مش معنى كده اننا ما نساعدش بعض
لا
بس معنى كده
انناما نبصش ان مساعده البنى ادم افضل من مساعدة الحيوان
اللى محتاج مساعده من النوعين نساعده
وثوابنا عند ربنا
وما نفرقش بين انسان وحيوان
لو قريت البوست دا فى اي حتة تانية هقول برده دى اكيد شيرين
مينفعش حد يعمل كدا الا شيرين
وقلبها وحنينها ورقتها
صدقينى دى مش مجاملة والله
وحتى شوفى الجملة دى
وهى لا تزال قابعه بمكانها لا تفقه شيئا وكأنها لم تكن لتفقد حياتها منذ قليل
فماذا تفعل قطه عمياء فى طريق تمر به السيارت
قد ايه الاحساس هنا واضح انه موجوع ومجروح عشان القطة المسكينة اللى ربنا رحمها عشان تقف امام سيارتك الرحيمة
هما بيقولوا يبقى انت اكيد اكيد فى مصر
بس انا بقى هاقووول
دى تبقى اكيد اكيد شيرين
ملحوظة
هى عربة ولا سيارة وحدى العملة يا شيرين
وتعالى اقرأى البوست عندى
دا اخر بوست هعمله لحد ما اخلص بقى
تحياتى للقطتين
شيرين وبنتها
كريم بهي
عزيزتي الرقيقة جدا
اولا انا عارف انتى عملتى مع القطه لية كدة وعارف انتى قد اية بتكرهي حاجة اسمها قسوةوخلى بالك بنيتكم ترزقون
وعلشان انتى نيتك خير ربنا هيرزقك الخير
خدتى بالك من قصدي
اه فاضل لسة عليكي 198 تعليق من ال200
:)
في سلامة الله
وبعد اعتذارك اعتبرى مفيش حاجه زعلتنى انتى يا شيرين من الشخصيات الى الواحد بيعتز بيهم ومجرد كلمه اعتزار منك انهت الموضوع
وانا معاكى انى الاعتزار مش ضعف ومنتهى القوه لانى الاعتارف بالخطا افضل من التمادى فيه بس فى علاقات زى الصداقه الحقيقيه والاخوات الى بجد كلمه شكرا او اسف بتقلب العلاقه بينهم من علاقه روحيه لعلاقه ماديه بحته وده انا مش بحبه فى علاقاتى عموما لانى فى حقوق وواجبات بين الاخوات والاصدقاء بالتبادل فلما حد يقوم بوجبه ناحيه صديق او اخ مش بيكون مستنى كلمه شكر ولو غلط مش مطالب يعتزر لانى الصديق او الاخ لازم يسامح وده الى انا كنت ااقصده
بالنسبه للى مزعلنى علشان مخلكيش فى حاله الحيره دى ولكونه مش حينفع اتكلم فيه هنا اول ما شوف رحيل حبلغها ولما تشوفك تبلغك حلو الحل ده :D بس برضه ده لايمنع احترامى الشديد لشخصك ولكتباتك
يارب ان شاء الله حاله عدم التركيز الى انتى فيه تنتهى قريبا واعتقد انى وجودها جنبك حيحسن كتير من حالتك النفسيه لانى جربتها مع شذى وشيكو يرحمهم الله ( عصافيرى )
كريم
بجد مش عارفه اقول ايه على كلامك الرقيق
ربنا يوفقك فى الامتحانات
وشوف انت عايزها عربه ولا سياره
وانا اخليها اللى انت عايزه
_____________________________________
سيد
خد بالى من قصدك
زى ما انت بتفهمنى
انا كمان بفهمك على طول
وانا على فكره البيت عندى مليان حيوانات
يعنى مش هى بنتى الوحيده
___________________________________
محمود
طمنتنى يا محمود
ميرسى ليك ولاخلاقك
انت كمان من الناس اللى بعتز بيهم جدا
وبحس ان البوست فى حاجه ناقصه لو انت ما علقتش عليه
على عصافيرك الله يرحمهم
كان عندى اتنين بغبغانات
كانوا معايا من وانا فى ابتدائى وماتوا من سنتين وكنت انا السبب فى موتهم
حدوته طويله
عمرى ما هسامح نفسى عليها ابدا
والبوست الاخير بتاعك
رائعععععععععع
ربنا يوفقك
ربنا يقومهالكم بالسلامه ياشرين و تحياتي لأنسانيتك و رقتك
قطه زى القمر واجمل من الحكايات
عشقتها فى وحدتى وبفرشتى بتبات
ماتت وقلبى انفطر والحزن بقى ضلى
غريبه قلبى الحجر يحزن على الحونات
الرباعية دى كنت كاتبها فى قطتى بعد 16 سنة عشرة
فعلا الحاجة الوحيدة اللى بكيت عليها فى حياتى كلها رغم ان حياتى مفيهاش حاجة سهلة
اللى عند قطتك ده فى الغالب التهاب فى اغشية المخ او رمد بس الشكل اللى فى الصورة مش رمد لو رمد حيبان على عنيها والماده اللى بتكونها ولو خبطة برده حيبان على ديلها وشكله وانها تقف فى وسط الشارع ده تصرف طبيعى لانها مش حتتحرك فى موقف خطر زى ده من غير ما تشوف بالتالى وقفت وسابت اللى قدمها يتصرف فى جميع الاحوال حولى تاكليهع خضار ولحوم فى الفترة دى وابعدى عن العضم والكات فوود
مش عارف يا شرين انا شايف ان تصرفك طبيعى اللى ما يعملش كده هو اللى مش طبيعى ابدا
الحياة مليانه مأسى الفكرة كلها اننا طالما قدمنا فرصة نساعد حد ما نسعدوش ليه ده اللى بيفرق انسان عن انسان
على فكرة انا زمان كان عندى قطة فارسى طرشة ماتت حزن على جوزها القطة دى كانت مرتبطه جدا بى ومش بتسمع كلام حد غيرى فى البيت ولا بتتعامل مع حد غيرى االغريبة انها رغم انها طرشة عمى ما ضربتها على حاجة غلط كنت بزعق بس وكان رد فعلها الطبيعى بمجرد انها تحس من ملامح وشى ان زعلان او بزعق وبعد ما تحاول تقعد جمبى علشان تصلاحتنى وما ارضاش انها تعتكف فى حمام الشقة زعلانة ما تطلعش منه غير ما اروح اجبها وارضى اقعدها جمبى ومستحيل اللى اتزعق لها عليه تعمله تانى
الحيوانت دى عندها مشاعر اكتر ما نتخيل واهم حاجة انها لما ترتبط بانسان بترتبط بيه فعلا من غير ما تكون محتاجة منه حاجة غير انها بتحبه وبترتاح له
ربنا يخليلك قطت بس حسبى عليها ووديها لدكتور
وربنا يكنبلك ده فى ميزان حسناتك
تامر
بعد البوست اللى انت كنت كاتبه وعلقتلك عليه
وبعدين انت لغيت البلوج بعد كده
عرفت اد ايه احساسك
علشان كده ما استغربتش من تعليقك ده
انسانيتك ورقة روحك
واضحه جدا قدامى
انا فعلا خدت القطه للدكتور
وقال ان عندها حالة ضعف شديد
وسوء تغذيه
وما يشبه لين العظام
وكتبلها على ادويه
انا متبعاها بيها
ان شاء الله هتبقى كويسه
اما عن قطتك انا مش عارفه اقولك ايه
انا عندى حيوانات كتيره هنا فى البيت
يوم ماحد منهم هيموت
هيموت منى جزء انا كمان
اعتقد انك فاهم انا اقصد ايه
لان ده كان نفس احساسك على قطتك
ياريت يا تامر الشعر اللى كنت كاتبه فى البلوج تنزله تانى
لانى حبيته جدا
وعايزة اقراه تانى
وشكرا لاحساسك
وشكرا لتعليقك
العصفور دا سميناه فزدق
بس دلوقتي عندي كمان
لوزة وسمسم وسمسمة
:))
أربع عصفورات قمرات
هههههههههه
dr.Roufy
ربنا يخليلك قمراتك دول
انا كمان ووالله ما هتصدقى
كان عندى عصفوره واحده
بس زى السكر
جابت من الجو 3 عصافير غيرها قمرات
من الشارع
كانوا طايرين فى الجو
ولما سمعوا صوتها دخلوا عندها الاوده
ومسكناهم
وكلهم عساسيل مع بعض
Post a Comment